O Le Tala i tua atu o La’u Tatalo o le Loto Faafetai mo le Lalolagi Atoa
O Se Fagua e Le‘i Faamoemoeina
Pe na e maua ea se aafiaga o le ala i luga i le vaeluapo ma se mafaufauga po o se uunaiga manino? Talu mai le amataga o la’u auaunaga o se Peresitene o Le Ekalesia a Iesu Keriso o le Au Paia o Aso e Gata Ai, sa i ai lava a’u fagua e le’i faamoemoeina. O le tele o nei [fagua] na faamaoniaina o ni taimi taua ma paia mai le Atua. Ou te fia faasoa atu se tasi o na aafiaga e faatatau i le savali faapitoa faavitio na faalauiloa i le aso, 20 Novema, 2020.
I ni nai vaiaso ua mavae, sa ou ala ae ai i le vaeluapo ma se manatu e tatau ona ou ofoina atu se tatalo o le faafetai i le Atua mo Ana fanau uma i le lalolagi. Na faatumulia lou mafaufau i mea uma ona e tatau ona tatou lotofaafetai ai ma le auala e mafai ai e le faailoaina atu o le lotofaafetai ona avea ma se agaga faamalolo i o tatou olaga. A o oo mai le musumusuga, o faamatalaga patino, e aofia ai le taimi ma le ala e tatau ona ou faasoa atu ai lenei savali, na oo mai i lo’u mafaufau ma lo’u loto. O le savali faavitio ua faasoaina atu i le asō e le o se tasi na tupu faafuasei; o se tasi na sau mai le lagi.
O se tasi o meaalofa silisili a le Atua
Talu mai lo’u auaunaga o se Peresitene o le Ekalesia i le 2018, o se tasi o mea ua uunaia soo e le Agaga i lou mafaufau o le ala e naunau ai le Alii e faaali mai Lona mafaufau ma Lona finagalo. O le avanoa o le mauaina o faaaliga o se tasi lea o meaalofa silisili a le Atua i Lana fanau—o loo avanoa mo i tatou taitoatasi.
Po o ai lava lou tagata, e mafai ona e tatalo i lou Tama Faalelagi mo faatonuga ma le taialaina i lou olaga. Afai e te aoao e faalogo i le Alii e ala i Ana uunaiga, e mafai ona e maua le taitaiga faalelagi i mataupu tetele ma laiti.
Ou te faafetai mo fagua ua ou maua i lo’u olaga sa fesoasoani ia te a’u e iloa ai o loo matala moni lava le lagi i le taimi nei. O lo tatou Faaola, o Iesu Keriso, o le faataitaiga aupito sili lea o le faalogo atu i le finagalo o Lona Tama ma avatu le faafetai i mea uma.
Ia Avatu le Faafetai i Mea Uma
E pei ona ou ta’ua i la’u savali faavitio, ua ou faai’uina ai e faapea, o le faitauina o o tatou faamanuiaga e sili mamao atu i lo le toefaitauina o o tatou faafitauli. Po o a lava o tatou tulaga, o le faaalia o le lotofaafetai mo o tatou faamanuiaga o se vaifofo faaleagaga lea e vave maua ai le toomaga ma umi ona tumau. I se faaupuga faigofie, “Faafetai i mea uma lava” (1 Tesalonia 5:18).
Faamolemole ia mafaufau e talia la’u valaaulia e faalilofia ia faasalalauga faaagafesootai i le isi fitu o aso e sosoo ai i lau lava api talaaga mo le agaga faafetai patino e faaaoga ai le #AvatuleFaafetai. Ma faamolemole ia tatou auai faatasi ma isi i le avatu o le faafetai i le Atua e ala i le tatalo i aso uma. E mafai e tatalo ona aumaia vavega. Tau ina ia tatou liliu uma atu i le Atua ma ia sili atu ona faatuatuaina atoatoa o Ia.